Höfn í Loðmundarfirði

Umskipunaröfn í Loðmundarfirði

Það er ekki ný hugmynd að flutningar kunni að færast af núverandi leiðum frá austur Asíu og yfir á heimskauta svæðið. Þá hefur Ísland oft verið nefnt sem hugsanlegur kostur fyrir umskipunarhöfn. Langanes hefur verið sú staðsetning sem horft hefur verið hvað mest til þegar umskipunarhöfn er rædd sem þjónusta eigi stór skip sem koma til með að nýta sér þessa mögulegu nýju siglingaleið um Íshafið. Einnig hafa verið ræddar hugmyndir um slíka höfn í Eyjafirði, Reyðarfirði, Hvalfirði auk Dýrafjarðar og Arnarfjarðar.

Talsverð vinna hefur farið fram

Undirritaður hefur unnið að útfærslum á þessari hugmynd og leitar nú að áhugasömum fjárfestum til að koma að þessu. Talsverð vinna hefur verið lögð í vinnu að staðarvali, gerð útlínu hafnar, dýptarmælingar, kortagerð og við að útfæra tölfræðilegar upplýsingar.

Rétt staðarval skiptir miklu máli

Þegar litið er til staðsetningar umskipunarhafnar er margs að gæta. Stórskipahafnir eru ekki byggðar hvar sem er. Dýpi þarf að vera nægjanlegt því stærstu gáma-flutningaskip í dag rista ansi djúpt fullhlaðin og því þarf að reikna með 30 metra dýpi. Landrýmið einnig að vera nokkuð. Þá er æskilegt að alþjóðaflugvöllur sé í næsta nágrenni sem og vinnuafl.

Hugmyndir um höfn sunnan Langanes óskynsamleg

Hugmyndir um höfn í Finnafirði, sunnan Langanes, er algjörlega út í bláinn. Fólk hefur verið dregið á asnaeyrum þar af fólki sem ekkert vit hefur á hlutunum og hugsar bara um eigin hagsmuni. Slæmt er þegar fólk í opinberri þjónustu tengir sig við svona vitleysu.

Helstu ókostir varðandi höfn í Finnafirði eru eftirfarandi:
1) Fara þarf í svo stórfellda uppbyggingu á svæðinu að útilokað telst vera að mati yfirvalda.
2) Fjölga þarf íbúum úr 500 í 5000. Mikið fámenni er á svæðinu, byggja þarf upp heila byggð frá grunni með allri þjónustu til að hægt sé að þjóna höfninni.
3) Semja þarf við marga landeigendur og greinilega þegar farið að valda vandamáli.
4) Byggja þarf upp nýjan alþjóðlegan flugvöll.
5) Byggja þarf risahöfn á afskekktum og einangruðum stað.
6) Búið er að benda á ýmsa annmarka á skipulaginu.
7) Staðsetning á Finnafirði er mikið úr alfaraleið
8) Finnafjörður er meira flói en fjörður og þarf gríðarmikil mannvirki til að verja hann
9) Fyrirhuguð höfn er mjög opin fyrir úthafsöldu og því erfitt að verja hafnarmannvirki og skip. Vinna við umskipun er með tölvustýrðum tækjum sem krefjast stöðugleika og mikillar nákvæmni.
10) Hugmyndir um nokkra kílómetra varnargarða eru mjög óraunhæfar og þarf mikið magn af efni, sem fer allt niður á 50-60 m dýpi!
11) Takmarkað vegasamband er við umheiminn.
12) Þá er dýpi þar mjög takmarkað. Hvað það varðar þá þarf að ráðast í miklar framkvæmdir við að sprengja og fjarlægja efni af hafsbotni. Að mínu mati er óraunhæft að ráðast í slíka framkvæmd og engin þjóð myndi fara í hafnargerð við þær aðstæður sem þar eru.

Kostir Loðmundarfjarðar

Hafnargerð og aðstæður í Loðmundarfirði eru mun ákjósanlegri en í Finnafirði og þar er heppilegri staðsetning fyrir umskipunarhöfn:

A) Um 10.000 manna byggð er í næsta nágrenni með góða reynslu í stóriðjuframkvæmdum (Í Fjarðabyggð þann 1. maí 2011 voru samtals 4573 íbúar búsettir (Norðfjörður, Mjóifjörður, Eskifjörður, Reyðarfjörður, Fáskrúðsfjörður, Stöðvarfjörður. Á Egilsstöðum og Fljótsdalshéraði búa um 3.406 (1. desember 2010) og Seyðisfirði rúmlega 600. Svo eru nokkur hundruð íbúar í jaðarbyggðum eins og Borgarfirði eystri, Fljótsdal m.m.)
B) Alþjóðlegur flugvöllur með alla þjónustu er rétt hjá svo að ekki þarf að fara í dýrar framkvæmdir til að byggja upp nýjan flugvöll.
C) Nóg er til af húsnæði á öllum þessum stöðum. Mikið atvinnuleysi er núna á Íslandi og mikill vandi hjá fólki á Stór-Reykjavíkursvæðinu að eignast húsnæði.
D) Loðmundarfjörður er skjólgóður og lokaður fjörður og allt aðrar aðstæður til að nota sem umskipunarhöfn þar sem mikils stöðugleika er krafist við umskipun á farmi.
E) Mun ódýrara er að dýpka og byggja upp í Loðmundarfirði. Kanna þarf dýpi á klöpp í firðinum en undirbúningur þess er hafin. Er það gert með bergmálsmælingum.
F) Svæðið er mjög afmarkað og auðvelt að loka af. En svona hafnarsvæði yrði frí-höfn, ekki ósvipað og Keflavíkurflugvöllur var á sínum tíma. (Best ef aðeins eitt ráðuneyti færi með umsýslu svæðisins, skipulagsmál og annað.)
G) Fáir eigendur sem þarf að semja við.
H) Fjörðurinn er kjörin fyrir stórskipahöfn. Hafnarbakkar geta verið um 6 km hvoru megin og bil á milli um 1-2 km. Þarna er nægilegt pláss fyrir alla þá starfsemi sem höfnin myndi koma til með að þurfa í nánustu framtíð.
I) Olíubirgðastöð fyrir hugsanlega nýjar olíuvinnslu út af Austfjörðum.
J) Eins og allir firðir á Austurlandi, þá hafa þeir mótast af skriðjökli. Loðmundarfjörður er grafinn út af tveim skriðjökuls tungum. Botnlag er V laga og eftir að síðustu ísöld lauk fyrir um 10.000 árum, að þá hefur fjörðurinn smá saman verið að fyllast upp af jarðvegi. Því er öll hafnargerð auðveldari í framkvæmd.

K) Samfara uppbyggingu í Loðmundarfirði, þyrfti að klára þær hugmyndir sem uppi hafa verið um samtengingu fjarða með jarðgöngum.

Samgöngur á landi

Þá er gert ráð fyrir að lestarspor verði lagt frá höfninni til Egilstaða um göng og svo þaðan til Reykjavíkur og jafnvel til Keflavíkur. Áætluð vegalengd er 450 til 500 km. ef farið er stystu leið norðan jökla og vestan Langjökuls til Reykjavíkur.
Hér er gróf hugmynd.

Áhugasamir aðilar óskast í undirbúningsfélag

Undirritaður hefur í nokkur ár ferðast mikið um Kína og helstu nágrannalönd þeirra og þekkir vel menningu og mannlíf á svæðinu. Fyrir tilstilli vina sat ég mörg kvöldverðarboð Kínverskra þingmanna í vor, fyrir árlegt flokksþing, og var það áhugi þeirra á Íslandi og umskipunarhöfn þar sem var tilefni þessara boða. Gerði ég þetta nánast nauðugur en hafði þó gaman af.

Kínverjar vilja að frumkvæði komi frá Íslendingum í þessu máli.

Hugsanlega undirbúningsfélag sem væri með aðkomu sveitarfélaga og samþykki ríkisins.

Þá sé ég fyrir mér að stofna félag með Kínverjum og hugsanlega öðrum Asíu-þjóðum um byggingu og rekstur þessarar hafnar. Gæti það orðið að veruleika nánast strax eftir að félag hefði verið stofnað á Íslandi.
Fjármagnskostnaður er ekki vandamál ef þetta er byggt í samvinnu við Kínverja. Hugsanlega má semja þannig við kínverska fjárfesta að Íslendingar eignist höfnina með öllum mannvirkjum á einhverjum áratugum.

Nú er auglýst eftir áhugasömum í þetta verkefni.

Guðmundur H Bjarnason

frost@fastmail.fm

------------

Austurglugginn 22. júlí 2011 Umfjöllun um höfn í Loðmundarfirði. pdf skjal.

Loðmundarfjörður A3 Teikning í góðri upplausn. pdf skjal.

Tenglar á ýmsar skýrslur.
Umskipunarhöfn á Íslandi fyrir Íshafssiglingar, fjórir mögulegir staðir
Fyrir stafni haf
Skýrsla utanríkisráðuneytisins - Ísland á norðurslóðum
Möguleikar á umskipunarhöfn á Íslandi
Jarðgöng á Austurlandi